مقتل سيدة دمنهور برصاص ضابط شرطة

مقتل سيدة دمنهور برصاص ضابط شرطة

 شقيق القتيلة: الأهالي احتجزوا الظابط وخلصته بالعافية وخدته بيتي.. كانوا عايزين يضربوه وواحد قالي «انت بتحميه وهو قتل أختك»
شقيقة زوج الضحية : طلق ناري جه في صدر نجلاء قدام بنتها.. وقعت على الأرض وكل الي على لسانها عايزة بوق ميه
ابنة القتيلة – 10سنوات- تفتش عن دم أمها: كان عمال يضربها وبعدين ضربها بالنار.. عمتى غمت وشى وهي بتصوت بس عرفت أن أمي ماتت

حالة من الحزن سيطرت على أهالي قرية كوبانية البرونجي بمحافظة البحيرة بعد مقتل سيدة في العقد الثالث على يد معاون مباحث دمنهور (أ س ع ) أمام أهلها وأبنائها الثلاثة أثناء حملة تنفيذ أحكام.
انتقلت البداية  لمحل الحادث، وتحدثت لعدد من أهل القرية وذوي المتوفية، اللذين وصفوا تعدي قوات الأمن على منزل المجني عليها وقتلها بـ "البلطجة".
وأوضحت شقيقة زوج المتوفية أن قوة أمنيه هاجمت منزلهم بعد منتصف الليل بدعوة تنفيذ حكم على والدها، ويدعى نصر اسماعيل عطا، وسبوا شقيقيها ، وأضافت: "أخويا سأل الضابط  هو في إيه وحضرتك أسمك إيه؟ لقيناه بدأ يشتم بالأم ويسب ويقول لاخويا أنت مين علشان تسألني أسمك إيه؟ أنت ماتعرفش أنا مين؟ يا ابن الـ و الـ ".

وتابعت في تصريحات خاصة للبداية: "نجلاء مرات أخويا أم لـ 3 أطفال وحامل في توأم، نزلت تحجز بين أخويا والأمناء اللي نازلين ضرب فيه، وراحت تبوس على رأس الضابط علشان يسيب أخويا(زوجها) ويمشي، أمي باست على راس الضابط علشان ياخد أبويا من غير مشاكل مع اخواتي علشان خافت يأذيهم لكن هو شتمها فقالت له " أنا مسامحاك بس أمشي".
وتسكمل : "الضابط رجع وطلع المسدس وضرب نار في الهوا، وماحسيناش إلا وطلق ناري جه في صدر نجلاء قدام بنتها الصغيرة شاهندة، وحطت إيدها على صدرها ووقعت على الأرض وكل الي على لسانها عايزة بوق ميه".
شاهندة أبنة المتوفية الكبرى وتبلغ من العمر 10 سنوات تفتش عن مكان دم أمها أمام باب المنزل، وقدا واروه ببعض من " القش" تقول : أمي ماتت قدامي، ماتت هنا، كان عمال يضربها بعدين ضربها بالنار قدامي، لقيت عمتى بتغمى وشى وهي بتصوت، بس أنا عرفت أن أمي ماتت".

وعن ملابسات الحادث قال"علاء غازي" شقيق المتوفيه أنه فوجئ بصوت اطلاق النار عن بعد فهرع للمكان ووجد عدد من الأهالي يمسكون بالضابط بعد هروب القوة الأمنيه المصاحبة له يقول: " خلصته من ايديهم بالعافية وخدته على بيتي، ومعرفش إيه اللي حصل، بعد 10 دقايق لقيت الناس بتخبط على الباب عايزين يمسكوه يضربوه"، ويضيف: وأنا بحاول أهدي الناس في شخص منهم قالي انت بتحميه وهو قتل أختك!!.
وتابع علاء بقوله: " أتصدمت وماعرفتش أعمل إيه، لو عملت فيه أي حاجه البلد كلها هتتأذي ومش هيسيبونا في حالنا طول العمر".. يصمت، ويستكمل: طاب ودم أختي؟.
يستطرد علاء ويعمل أمين شرطه: "ناس كلموني من وزارة  الداخليه ومباجث دمنهور وقالولى لو جراله حاجه أنت اللي هتتحاسب، هو دلوقتي في عهدتك".
 من جانبه قال "نصر اسماعيل"  المتهم بتبديد شيك لصالح الإصلاح الزراعي والذي على إثره اتجهت القوة الأمنيه لمنزله: اللي حصل أكيد كان تشابه أسماء، لأن أنا مخلص قضية غرامة الإصلاح الزراعي من سنه ومفيش أي حاجه عليا، وعايز أعرف هما كانوا جايين لي ليه؟ أسألوهم إيه اللي جابهم عندنا يقتلوا عيالنا بدل ما يبقوا في خدمة الشعب".
وحصلت البداية على شهادة من واقع جدول الجنح في القضية رقم 27714لسنة 2014 ضد"نصر اسماعيل عطا" تثبت سداد نصر للغرامة وحصوله على حكم البراءة، وهي القضية التي يعتقد نصر أنها المبرر الوحيد لهجوم الداخلية على منزله.
هذا الخبر منقول من : البداية