رد الفعل

رد الفعل

رد الفعل
مقال الامس عن الطبقه الوسطي كشف ردود افعال متباينة كل علي حسب حالته النفسيه والماديه والعمريه. ولكن الغالبيه العظمي منها كان متفائل بالرغم من بعض التخوفات. وهذا تماماً هو حال هذه الطبقه الوسطي العظيمه.

لكن ما لفت نظري كانت بعض التعليقات الغاية في التشاؤم وغاية في الاحباط وان الدنيا سوده ولكن لاحظت عدة أشياء لابد من ذكرها مع كل هذا التشاؤم. وبدأت انتبه لاي تعليق تشاؤمي لا يجد صاحبه اَي بصيص أمل او نور او لا يحاول إيجاد سبل للخروج من الازمه الاقتصاديه التي نمر بها ، دائماً ما بذكر عدة أشياء بعينها وتعاد في كل تعليق.

اول شكوي والقاسم المشترك الأعظم هو العاصمه الاداريه الجديده! هي فرساهم اوي كده ليه؟ وكم الافتراء عليها غريب. انا زرتها في يناير الماضي وعرفت حاجات كتير اوي جديده عنها وتصححت معلومات اخري كانت متداوله في وقتها ، مثلاً عن السور الخرساني العالي الذي يبني حولها - كلام فارغ لا يوجد سُوَر من اَي نوع ، وعن قيام الجيش بكل اعمال البناء دون اَي فرصه لشركات المقاولات الأهليه ان يكون لها نصيب من الاعمال - كلام كله غلط لان الشركات هي التي تقوم بالعمل ولكن تحت رقابة الجيش الذي يتأكد من التزام هذه الشركات بالمواصفات المتفق عليها والاسعار والتوقيت المتفق عليهم.

وطبعاً اهم حاجه يقولوها علي العاصمه الاداريه الجديده هي: ولزومها ايه مش كنّا صرفنا الأموال الطائله دي علي المصانع احسن علشان الاقتصاد ينتعش. واخدين بالكم ان الرد اتغير ولَم يعد اننا نصرف الفلوس دي علي الاكل زي ما كانوا بيقولوا الاول علي اموال المصروفة علي المشروعات العملاقه او حتي التسليح. لكن التقدم الان في المطالبه بالمصانع علشان نحسن الاقتصاد. والكلام ده علي أساس ان الاعمال التي تقام فيها مش بتشغل جيوش من الناس ومن الشركات المكملة للإنشاءات؟ كم العماله في هذا المشروع وحده استوجب إقامة وحدات اقتراع خاصه وقت الانتخابات لكم العاملين به والذين أصلاً ليسوا من القاهره. وهي دي بردو مش عماله؟ فعلاً مش عارفه العاصمه الاداريه الجديده دي عاملالهم ايه.

النقطه الثانيه التي لابد ان يذكروها بالرغم من انها غير صحيحه لكن وجدوا انها ممكن تثير المشاعر هي إشاعة زياده مرتبات الوزراء. وللاسف تمكنوا من إقناع بعض الناس بصحتها الي درجة انهم بعثوا لي بنص القرار الخاص بالمرتبات ولَم اجد فيه اَي شئ يشير الي زيادة المرتبات. بل كله كان مُنصّـب علي المعامله الحسابيه الدفترية للمرتبات ولَم تذكر كلمه واحده عن اَي زياده. ولكن من استخدموها كان لزيادة الاحباط وخصوصاً قبل الإعلان عن زيادة المرتبات والمعاشات للعاملين بالدوله. وبعد اعلان عن هذه الزيادات بدأت نبرة "ودي تعمل ايه في كل الغلاء ده"! لازم تكسير معنويات ولازم احباط.



وأخيراً لازم كمان الكلام علي البذخ في العربيات الحكومية وعدد العربيات الخاصه بكبار موظفي الدوله والموكب بتاع الريس … وأول لما قالوا كده افتكرت الموكب بتاع مرسي اللي كان متكون من ٢٥ عربيه … اتاريهم دايماً يرجعوا للحكايه دي لما يعوزوا يشوهوا السيسي يتكلموا علي الموكب بتاعه. فإفتكرت ان موكبه لما راح يحلف اليمين امام البرلمان كانت عربيه واحده وعدد من الدرجات البخارية. هو ده الموكب اللي قالبين عليه الدنيا في الصرف والبذخ؟ كانوا عاوزين ايه ؟ عربيه نص نقل محاطه بتكاتك؟ يا حرام دول وصلوا لحاله صعب صحيح.

وطبعاً لا يخلوا الامر من التباكي علي الطبقه المطحونه طبقة الغلابه وانهم حايموتوا من الجوع وانهم حايقوموا بثوره وحرام حرام حرام ……

وأجمل ما في الموضوع هو عندما ادخل علي حسابات هؤلاء الذين عادةً ما يكون أسمائهم "فرس الليل" او "الضمير الصاحي " او "النجوم في عز الضهر" … حاجات عجيبة كده ، فلا اجد اَي شئ علي حسابهم. ولا أصدقاء ولا اَي حاجه هما كاتبينها ، بعض البوستات منقوله وغالبا لا تمت للسياسه بصله. إما دعوات طيبه او مناظر طبيعية جميله … اَي كلام يملأ فراغ علشان يبان ان ده حساب حقيقي! مش عارفين انهم انكشفوا من زمان. بس بردو في شئ من التطور لانهم بطلوا يطالبوا بفلوس المشاريع العملاقه والتسليح تروح للاكل والان تروح للمصانع علشان دي الموده اليومين دول … ال يعني مافيش مصانع بتبني ولا بتشتغل خالص، ولا مدن صناعيه زي صناعة الاثاث في دمياط ولا الصناعات المكملة لمشاريع مزارع الأسماك او مصانع البتروكيماويات او مصانع لوازم استخدام الطاقه الشمسية الخ الخ.

ومهما كشفناهم بردو مش حايبطلوا لانهم بيأخذوا اموال علي عملهم هذا وبيساعدوا قناة ألجزيره بكليبات من الشكوي والولولة. لكن بردو في المصريين الجدعان اللي فاهمينهم وبيردوا عليهم.

ولسه حانشوف منهم كتير الايام الجايه دي. وكل ما تزيد الازمه كل ما حايشدوا حيلهم اكتر لزيادة الاحباط. الدور علينا بقي زي الراجل الجدع ده اننا تكشفهم ونفهمهم ان دي بلدنا وبنحبها ومش حانسمح لحد يقلبنا عليها وان مافيش حد موكل للكلام بالنيابه عن "الغلابه" لانهم لهم لسان وده واحد منهم بيتكلم عن نفسه.
حفظ الله مصرنا الحبيبه وابنائها الواعين
Aida Awad