كنت يوماتى فى الطابور

خاص بمصر الان

كنت يوماتى فى الطابور
بهتف وأقووووول
تحيا مصر !
وأنا عمرى ماتهنيت معاكى
بأى نصر !
بالعكس أنا اتعصرت فيكى
شبعت عصر !
هو انتى مش بتحبى فينا
غير بتوع الإختلاس ؟!
ولا انتى عندك ناس وناس !؟
فين العدالة والزبالة فيكى أكتر م البشر !
انا حد حاسس انه جواكى اتحشر !
عايزانى أحب فيكى إيه ؟
وانتى بتحبى الشاويش
مانا أصلى مش بعرف أتاجر فى الحشيش
علشان نضيف ..
وانتى بتحبى الوحاشة
نفسى أفتح مرة شاشة
وأبتسم
بلاقى دايماً اكتئاب بيترسم !
أجمل خبر سعته فيكى هو فرصة للهروب
قولت أخيراً هابتعد عنك وأتوب !
صدقينى اللى عملته مش جنون
أصل الهروب دايماً بيبقى من السجون..
فماتزعليش !
بس انتى ليه مسكتى فيا ماسيبتينيش