 |
| روزالي |
الاسبوع اللي فات حصلت حاجه يمكن نكون مخدناش بالنا منها ..
او يمكن نكون قرينا الخبر من غير ما نقف قدامه شويه ..
بنت اسمها روزالي .. عندها 13 سنه .. من امريكا .. لقيوها منتحره ف اوضتها .. شنقت نفسها .. وسابت رساله كارثيه جنب جثتها كتبتها قبل ما تنتحر .. بتوضح فيها سبب انتحارها لأهلها .. والسبب هو انها تعبت من سخرية صحابها ف المدرسه منها .. صحابها اللي كانوا بيتريقوا علي شكلها ولون بشرتها وشكل سنانها طول الوقت .. لحد ما البنت ( الطفله ) بقيت تخاف تبص ف المرايه .. وفقدت ثقتها ف نفسها تمامآ .. ووصل بيها الحال ف النهايه لمشهد مأساوي .. طفله متعلقه ف حبل مشنقه ف اوضتها
طبعآ الانتحار خطيه وجريمه ف حق الله والذات .. لكن البنت دي كطفله مكنتش مدركه للنقطه دي .. هي بس حبت تخلص من الكلام السلبي اللي دايمآ بتسمعه من صحابها طول الوقت .. ووصلت لأعلي درجات الاكتئاب اللي بالتالي وصلتها للانتحار شنقآ
متخيلين حجم المعاناه اللي ممكن حد يعيش فيها بسبب كلمه سخيفه بتقولوها حتي ولو في شكل هزار ؟!
ناس كتير بتكون فاكره انها من حقها تتريق علي شكل غيرها بمنتهي البجاحه .. ناس كتير بتحب ( تستظرف ) و تنتقد غيرها ب كلمات صعبه و قاسيه .. وميعرفوش ان الكلام ده ممكن يقضي تمامآ علي ثقة الشخص ف نفسه ويتسببله ف جرح كبير بيفضل وبيسيب أثر ..
من فضلكم ..
متتريقوش علي شكل حد
متتريقوش علي وزن حد
متتريقوش علي طول حد
متتريقوش علي لبس حد
متتريقوش علي كلام حد
من فضلكم ..
بلاش تحسسوا اللي قدامكم انكم احسن منه .. بلاش تجرحوا غيركم بكلام قاسي وجارح .. لو مش قادرين تشجعوه وتطمنوه بكلمه حلوه يبقي اسكتوا أحسن .. مش شطاره ولا روشنه انكم تسخروا من أي شخص مهما كان .. هزاركم بيأذيه نفسيآ وبيوجعه .. وكل كلمه سلبيه بتخرج منكم بتجرح مشاعره .. حتي لو مبينش وفضل مخبي
كُونُوا لُطَفَاءَ بَعْضُكُمْ نَحْوَ بَعْضٍ ..
المصدر الاقباط متحدون